MEMUJI: Bocah-bocah lagi memuji marang Gusti ing Natal GITJ Kudus. |
Ing greja, saben Natal mesthi
dikebaki dening pasamuwan. Ora mung pasamuwan kang kaya adat biyasane. Awit,
mesthi ana pasamuwan tamu. Tegese,
pasamuwan mau mapan ing tlatah liya, nanging wektu Natal sowan marang wong tuwa
utawa kadang. Banjur ndherek ngabekti ing greja wong tuwane/kadange. Ancase arep ngabekti, nyawiji, memuji, lan
mirengake sabdane Gusti.
Mula ing wektu Natal, greja lumrahe
nyiapake ubarampe kang luwih akeh. Ora mung nyediakake kursi cacah akeh, nanging
uga masang tratag supaya bisa nampung kabutuhane pasamuwan. Yen greja ora duwe
kursi kang akeh cacahe lan tratag, mesthi nyewa ing persewaan. Rawuhe pasamuwan pancen kudu disambut kanthi kahanan
kang ora nguciwani.
Ana greja kang nyawijekake
adicara ibadah lan pahargyan Natal, nanging ana uga kang misah antarane adicara
ibadah lan pahargyan Natal. Kayata, ibadah ing wektu esuk, pahargyan ing wektu
sore. Sanadyan ngono, apa kang disawijekake utawa kang kapisah, tetap karawuhan
akeh pasamuwan. Malah ing adicara pahargyan, lumrahe bocah-bocah uga padha
diajak dening wong tuwane. Cikben ngreti apa bae adicara kang katindakake.
SEMLIWER:Bocah-bocah padha nggawa dolanan kang lagi bae dituku. |
Yen mangreteni ing Natal ana
akeh bocah, wong-wong kang padha dodol dolanan, jajanan, lan liyane lumrahe padha njrabing ing ngarepane greja.
Ancase, bocah-bocah anake pasamuwan kuwi cikben padha tuku. Mula ora prelu
gumun yen wektu Natal ing greja kang akeh bocahe, pating sliwer dolanan digawa
bocah-bocah rana-rene kaya-kaya ndherek memuji asmaning Gusti. Ananging, ana
uga swara tangis bocah-bocah awit telat tuku dolanane.
Kanggo njaga kenyamanane lumakune adicara Natal, ing saputerane greja dijaga dening aparat. Malah kang bungahake ana uga kadang-kadang kang beda iman (organisasi agama sanes) dherek njaga katemtremane adicara kuwi. Dadi, Natal malah nyawijekake wong siji lan sijine sanadyan beda umur, asal-usul, kapercayan, lan ancas tujuwane.
Mbokmanawa kuwi kang diarani berkah Natal
sumebar ing sapa bae. Persewaan kursi
lan tratag, wong dodolan, aparat, kadang-kadang kang beda iman, bocah-bocah, lan
pasamuwan. Kabeh bisa gayut-ginayut lan sangkul-sinangkul. Berkah kang katrima
ya bener beda-beda. Ana kang nrima berkah kajasmanen, karohanen, kamanungsan,
sosial, sesambungan, lan liyane. Ya, rawuhe Gusti pancen nyebar berkah kanggo sapa bae.
Tidak ada komentar:
Posting Komentar